The Guardian segir að samkvæmt niðurstöðum nýju rannsóknarinnar, sem byggðist á yfirferð yfir 137 fyrri rannsóknir, sýni að heimsfaraldurinn hafi haft „minniháttar“ áhrif á andlega líðan fólks. Nýja rannsóknin hefur verið birt í the British Medical Journal.
Brett Thombs, prófessor við McGill háskólann og einn höfunda rannsóknarinnar, sagði að sumar þeirra hugmynda sem hafa verið uppi um áhrif faraldursins á andlega líðan séu byggðar á „lélegum rannsóknum og frásögnum“. Þetta hafi orðið að einhverskonar spádómum en þess í stað sé þörf á „traustum vísindum“.
Hann sagði að frásagnir af slæmri andlegri heilsu fólks í faraldrinum hafi að mestu verið byggðar á einstökum rannsóknum sem hafi veitt mynd af ákveðnum aðstæðum, á ákveðnum stað, á ákveðnum tíma. Sjaldnast hafi verið gerður langtíma samanburður í þeim um hvernig staðan var fyrir faraldur og eftir.
