Það er nú óvenjulegt að bankaræningjar séu nægjusamir. Yfirleitt vilja þeir fá eins mikið af peningum með sér og þeir geta. En þannig var það ekki þegar Donald Santacroce rændi banka í Utah í Bandaríkjunum nýlega.

„Fyrirgefið mér en þetta er rán,“ sagði hann þegar hann kom inn í bankann. „Vinsamlegast afhendið mér 1 dollara, hver. Takk fyrir,“ sagði hann síðan.

Starfsfólkið gerði það og bað hann síðan um að hafa sig á brott. En það vildi þessi „hættulegi“ bankaræningi ekki. Hann sagði að starfsfólkið ætti að hringja í lögregluna og fékk sér síðan sæti á bekk og beið. NBC News skýrir frá þessu.

Hann sat á bekknum í nokkra stund áður en lögreglan kom og handtók hann. Áður hafði hann kvartað yfir því hvað það tók lögregluna langan tíma að koma á vettvang. Hann sagði starfsfólkinu að það gæti glaðst yfir að hann væri ekki með byssu.

Santarcroce afhenti lögreglunni dollarana möglunarlaust og var síðan fluttur á brott.