Emma Parker, 39 ára, vinnur væntanlega ekki til verðlauna sem móðir ársins. Hún var nýlega dæmd í árs fangelsi fyrir að hafa skorið hamstur dóttur sinnar í tvennt og borðað hann. Hún lét ekki þar við sitja því hún tók þetta allt upp á myndband og birti á samfélagsmiðlum.

The Sun skýrir frá þessu og segir að í myndbandinu, sem er 27 sekúndur, sjáist Parker pikka í hamsturinn, sem er í hlaupahring, með hníf. Síðan sker hún hann í tvennt á meðan hann öskrar af sársauka. Því næst fylgir myndskeið þar sem hún borðar hamsturinn og skolar niður með vatni.

Parker, sem er sögð vera fíkniefnaneytandi, sagði fyrir dómi að hún hafi aflífað hamsturinn, sem hét Herra Nibbles, af því að tveir hundar fjölskyldunnar hefðu bitið hann.

Dýralæknir bar vitni fyrir dómi og sagði upptökurnar „mjög truflandi“.

Dómarinn sagði málið vera viðbjóðslegt og dæmdi Parker í 12 mánaða fangelsi.