Hæstiréttur Spánar úrskurðaði nýlega að hópur nektarsinna, sem á íbúðir í þyrpingu húsa á ferðamannasvæði hafi ekki mátt krefjast þess að aðeins naktir íbúar mættu nýta sér sameiginlega aðstöðu húsanna og að þeir hafi ekki mátt ráða öryggisverði til að stýra aðgangi fólks að sundlauginni.

Það voru átta íbúar í húsaþyrpingunni, sem er í Andalúsíu, sem fóru með málið fyrir dóm vegna þess að þeir töldu það brjóta gegn grundvallarmannréttindum þeirra að þess væri krafist að fólk væri nakið.

Málinu var vísað frá á fyrstu dómstigum en hæstiréttur tók það til meðferðar og féllst á málatilbúnað þeirra. The Guardian skýrir frá þessu.

Sumir íbúanna sögðu að samfélagið á svæðinu hafi byggst upp undir sterkum áhrifum nektarsinna og að nekt væri „óhjákvæmileg“ á sameiginlegum svæðum á borð við sundlaugina og í görðunum. Þetta féllust dómararnir ekki á og sögðu í dómsorði að krafan um nekt hafi haft mikil og truflandi áhrif á þá sem vildu ekki vera naktir á almannafæri.