Í apríl á síðasta ári var tilkynnt um hvarf Felicia Johnson, 24 ára, frá San Diego í Kaliforníu. Blóðugur farsími hennar og veski fundust nærri almenningsgarði í Houston en hana var hvergi að finna.

Tæpu ári síðar fundust sundurhlutaðar líkamsleifar hennar í Texas. Morðinginn gengur enn laus að sögn lögreglunnar.

Það var starfsmaður samgönguráðuneytisins sem fann líkamsleifarnar í Sam Houston National Forest nærri Flamingo Lakes. Kennsl voru borin á líkið með DNA-rannsókn og rannsókn á tönnum.

Johnson var í Houston í Texas á síðasta ári að leita sér að vinnu. Hún sótti meðal annars um starf á dansstað.

Lögreglan kærði Chukwuebuka Nwobodo, 28 ára, fyrir morð og fyrir að spilla sönnunargögnum í júní. Hann hafði verið handtekinn vegna rannsóknar málsins í maí en var síðan sleppt án þess að vera kærður. Hann gengur enn laus.

Lögreglan segir að gögn sýni að hann hafi sótt Johnson heim til hennar og ekið heim til sín. Þar hafi hann myrt hana og hlutað líkið í sundur. Hann hafi síðan losað sig við líkið og persónulega muni hennar til að reyna að leyna ódæðisverkinu.

Eftir að Johnson hvarf keypti Nwobodo sér sög, ruslapoka, handklæði og vasaljós. Í bíl hans fann lögreglan einnota hanska, eldhúshníf og skóflu. Í skottinu og aftursætinu fannst blóð úr Johnson. Einnig fundust lífsýni úr Johnson í íbúð Nwobodo.

Þegar skoðað var hvað hann hafði skoðað á Internetinu kom í ljós að hann hafði leitað sér upplýsinga um „hvernig á að vera raðmorðingi“ og „hvernig á að skipuleggja morð án þess að nást“.