Ekstra Bladet skýrir frá þessu og segir að Brønnum hafi verið dæmdur í ævilangt fangelsi í október 2021 fyrir fyrrnefnt morð og þrjár morðtilraunir. Hann skaut Kaplan til bana og á þrjá aðra menn þann 2. janúar 2021 um klukkan 19. Þetta átti sér stað í Hillerød þar sem fjórmenningarnir voru í svartri Audi bifreið.
Kaplan lést af völdum skotsára. 21 árs „stríðsráðherra“ NNV særðist illa en lifði af. Hinir tveir sluppu ómeiddir og gátu ekið með Kaplan og „stríðsráðherrann“ á sjúkrahús í Hillerød.
Brønnum var handtekinn 10 dögum síðar. Hann játaði að hafa skotið á bílinn úr hálfsjálfvirkri skammbyssu. Hann hefur allt frá upphafi sagt að um nauðvörn hafi verið að ræða því hann hafi talið að Kaplan og félagar hans væru vopnaðir.
Morðið á Kaplan var kveikjan að miklum átökum á milli Bandidos og NNV. Skotárásir voru gerðar og ofbeldi beitt auk þess sem mikið var um íkveikjur á fyrri helmingi 2021. Þetta gerði að verkum að Brønnum var dæmdur eftir sérstöku ákvæði hegningarlaganna sem heimilar tvöfalt þyngri refsingu ef afbrotið var liður í átökum glæpagengja.