Á föstudaginn fannst 25 ára kona á lífi í Big Bend þjóðgarðinum í Texas í Bandaríkjunum. Hennar hafði verið formlega leitað síðan 15. nóvember en talið er að hún hafi verið týnd mun lengur því ekkert hafði spurst til hennar síðan hún yfirgaf heimili sitt þann 8. nóvember.

Konan, sem heitir Christy Perry, var að sögn með meðvitund og gat talað við leitarmenn þegar hún fannst.

Hún var flutt með þyrlu á sjúkrahús í bænum Odessa.

CNN segir að Perry hafi yfirgefið heimili sitt þann 8. nóvember á bílaleigubíl. Hún sást síðan við þjóðgarðinn þennan sama dag.

Hún hafði pantað sér gistingu en skilaði sér aldrei á áfangastað.

Nokkrum dögum síðar hófst leit að henni.