Í mars 2019 sáu vísindamenn, sem voru við rannsóknir undan suðvesturströnd Ástralíu, hryllilegan atburð. Tugur háhyrningar réðst á eitt stærsta dýr jarðarinnar, steypireyði. Þeir bitu stóra kjötbita úr síðu hvalsins og drapst hann klukkustund síðar. Þetta var í fyrsta sinn sem vísindamenn sáu háhyrninga ráðast á steypireyði.
Á undanförnum mánuðum hafa háhyrningar sést ræna grindhvalskálfum og rífa hákarla á hol til að gæða sér á lifur þeirra.
Undan ströndum Portúgals og Spánar hefur lítill hópur háhyrninga tekið upp á því að ráðast á báta og sökkva þeim.
Allir þessir atburðir sýna hversu greind þessi rándýr eru.
Live Science hefur eftir Deborah Giles, hjá University of Washington, sem vinnur að rannsóknum á háhyrningum að þetta séu dýr með mjög flókinn og þróaðan heila. Hluti heila þeirra tengist minni og tilfinningum og séu mun þróaðri en mannsheilinn.
En þessir nýlegu atburðir, sem var getið hér á undan, vekja upp spurningu um hvort háhyrningar séu að verða greindari?
Josh McInnes, sjávarlíffræðingur sem rannsakar háhyrninga og starfar við University of British Columbia, sagði að ólíklegt sé að heilar háhyrningar séu að breytast en hegðunarbreyting geti haft áhrif á hegðun dýra og hópa dýra en þegar kemur að þróun þá eigi hún sér stað á þúsundum ára.
En háhyrningar eru fljótir að læra og geta því kennt hver öðrum eitt og annað og þannig orðið „gáfaðri“ sem hópur. Sumt af því sem við höfum séð til þeirra að undanförnu er hugsanlega hegðun sem þeir hafa sýnt af sér mjög lengi en við erum bara núna fyrst farin að taka eftir og skrá. Eins og hjá okkur mönnunum þá verður sumt af þessari lærðu hegðun að tísku sem sveiflast upp og niður í bylgjum.
Það getur einnig ýtt undir nýja hegðun hjá háhyrningum að þeir komast oft í snertingu við fólk í tengslum við bátsferðir þess og fiskveiðar. Eftir því sem umhverfið breytist, þeim mun hraðar verða háhyrningar að bregðast við og treysta á félagsmótun til að geta haldið velli.
