Breska verslunarkeðjan Booths hefur ákveðið að hætta notkun sjálfsafgreiðslukassa í verslunum sínum og notast eingöngu við hefðbundna mannaða kassa. Segir keðjan að þetta sé hluti af því að láta viðskiptavinum finnast að vel sé tekið á móti þeim og að þeir séu velkomnir.

Sky News skýrir frá þessu og segir að keðjan muni fjarlægja sjálfsafgreiðslukassa úr öllum verslunum sínum nema tveimur.

Talsmaður keðjunnar sagði að ákvörðunin byggist á því sem viðskiptavinir hafa sagt og „því sem okkur finnst rétt að gera“. „Við teljum að afgreiðslufólk á kössum tryggi viðskiptavinum betri upplifun,“ sagði hann.

Verslunarkeðjan, sem er í dýrari kantinum, rekur 28 verslanir í Lancashire, Cumbria, Cheshire og Yorkshire.

Sky News segir að talið sé að keðjan sé sú fyrsta sem hættir að nota sjálfsafgreiðslukassa.