Afar lítil umferð var um svæðið enda fáir íbúar í næsta nágrenni þess og því vakti hluturinn ef til vill meiri athygli mannsins en ella. Þegar betur var að gáð var um að ræða einhvers konar sjónvarpsskáp sem var umlukinn steypu.
Maðurinn gerði það eina rétta í stöðunni og hafði samband við lögreglu sem kom á vettvang og skoðaði skápinn.
„Ég var engan veginn búinn undir að sjá það sem var inni í skápnum,“ segir lögreglustjórinn Carl James sem á þessum tíma var rannsóknarlögreglumaður og sem slíkur kallaður á vettvang.
Eftir að hafa brotið steypuna utan af skápnum fundu þeir stóra kistu og inni í kistunni var íþróttataska. Í töskunni var svo búið að vefja líki ungrar stúlku inn í teppi. Lögregla reyndi hvað hún gat að bera kennsl á lík stúlkunnar en allt kom fyrir ekki. Nú 35 árum síðar er búið að handtaka tvær manneskjur vegna málsins og eru þær grunaðar um aðild að dauða stúlkunnar.
Bandarískir fjölmiðlar greina frá því að inni í skápnum hafi verið lík hinnar fimm ára gömlu Kenyatta Odom og hefur móðir hennar og þáverandi stjúpfaðir verið handtekin. Fjölskyldan var á þessum tíma búsett í borginni Albany í um 140 kílómetra fjarlægð frá Millwood.
Það var í janúar á þessu ári sem aðstandandi fjölskyldunnar hafði samband við lögreglu eftir að fjallað var um málið í fjölmiðlum. Aðstandandinn sagði að móðir stúlkunnar hafi á sínum tíma útskýrt skyndilegt hvarf hennar með þeim orðum að hún hefði flutt til blóðföður síns og þar ætlaði hún að búa. Aðstandandinn sagðist alla tíð hafa efast um þá frásögn.
Lögregla telur að Kenyatta hafi verið myrt í Albany áður en lík hennar vart flutt í umrætt skóglendi rétt fyrir jólin 1988. Móðir hennar, 56 ára, og fyrrverandi stjúpfaðir, 61 árs, voru handtekin á fimmtudag og ákærð fyrir morð.
