Maðurinn, sem býr í Sydney í Ástralíu og er kvæntur, þjáist af andlegum veikindum, apotemnophilia, sem gera að verkum að hann finnur til mikilla óþæginda með líkama sinn og vill verða fatlaður. Þetta er sem betur fer mjög sjaldgæfur sjúkdómur sem tekur yfirleitt á sig þá mynd að sjúklingarnir vilja láta aflima sig eða verða blindir eða heyrnarlausir.
Sjúklingunum finnst þeir ekki vera í sambandi við líkama sinn og telja sig eiga að vera fatlaða á einhvern hátt og eru reiðubúnir til að ganga mjög langt til að láta það rætast.
Mirror segir að fyrrgreindur maður hafi rætt málið í fréttaskýringaþættinum The Project nýlega og hafi meðal annars sagt: „Vinstri höndin tilheyrir ekki líkamanum, þannig hefur þetta verið allt mitt líf.“
Hann sagðist einu sinni hafa reynt að höggva höndina af til að losna við þau óþægindi sem fylgja því að vera með hana en hafi ekki komist langt áleiðis vegna þess að sársaukinn var svo mikill.
Fyrir þremur árum féllst læknir einn á að taka höndina af honum en vegna heimsfaraldurs kórónuveirunnar var aðgerðinni frestað og skurðlæknirinn, sem ætlaði að gera aðgerðina, er nú látinn. Eini möguleiki mannsins á að láta fjarlægja höndina er að nýta sér þjónustu lækna á einkasjúkrahúsum en það kostar stórfé og það á hann ekki til.
Annar maður, Robert Vickers að nafni, kom einnig fram í þættinum og sagði að frá 10 ára aldri hafi hann glímt við mikla hvöt til að losna við vinstri fótinn. Hann hafi reynt ýmislegt í gegnum árin til að valda skaða á honum. Þegar hann var 41 árs notaði hann þurrís til að valda svo miklum skemmdum á fótleggnum að læknar neyddust til að taka hann af. Hann sagði það hafa verið „algjöra sælu“ að vakna upp á sjúkrahúsinu án fótarins.
