DV fjallaði um málið í sumar og hefur það vakið mikla athygli í Ástralíu.
Þeir sem létust voru tengdaforeldrar Erinar, hjónin Don og Gail Patterson og Heather Wilkinson, sem var systir Gail.
Erin bauð upp á Wellington-nautasteik þennan örlagaríka dag en með kjötinu bar hún fram sveppi sem reyndust baneitraðir. Sveppurinn sem um ræðir, grænserkur, er einn eitraðasti sveppur heims og ber hann ábyrgð á meirihluta dauðsfalla af völdum sveppaeitrunar í heiminum. Inniheldur hann efni sem eyðileggur nýru og lifur.
Eiginmaður Patterson, Ian, borðaði sveppinn einnig og þurfti hann að dvelja á sjúkrahúsi í tvo mánuði áður en hann útskrifaðist. Hann er enn að ná sér.
Lögreglu grunar að Erin hafi vitað að sveppurinn væri eitraður og til marks um það er sú staðreynd að hún hefur nú verið ákærð fyrir þrjár morðtilraunir á árunum 2021 og 2022. Talið er eitt málið varði fyrrverandi eiginmann hennar, Simon, sem veiktist alvarlega í kjölfar matareitrunar.
„Ég hrundi niður heima og var haldið sofandi í 16 daga. Á þeim tíma voru gerðar þrjár neyðaraðgerðir á smáþörmunum og ein áður ákveðin aðgerð. Fjölskyldan var tvisvar kölluð á sjúkrahúsið til að kveðja mig því ekki var talið að ég myndi lifa af,“ skrifaði Simon á Facebook á sínum tíma.
Erin hefur neitað sök í málinu og sagðist hafa keypt sveppina á mörkuðum. Í yfirlýsingu sem ástralskir fjölmiðlar birta er haft eftir henni að hún sé eyðilögð vegna málsins. Hún hafi ekki átt neinar óuppgerðar sakir við þá sem veiktust eða létust.
