DV sagði í gær frá uppnámi sem varð inn á veitingastað McDonald’s í Birmingham þegar maður gekk inn á staðinn og losaði úr kassa sem var fullur af lifandi músum á gólfið. Maðurinn var með fánaliti Palestínu á höfðinu.
Mail Online segir svo frá því í dag að skemmdarvargar hafi unnið miklar skemmdir á útibúi Starbucks í Yorkshire í gærkvöldi þar sem rúður voru brotnar. Þá voru skemmdarverk unnin í gærkvöldi á stað McDonald’s í Keighley, rúður brotnar og skordýrum komið fyrir inni á staðnum. Fleiri sambærileg skemmdarverk hafa komið undanfarna daga.
Einstaklingar sem tala fyrir málstað Palestínu í stríði Ísraelsríkis við Hamas-samtökin hafa hvatt til þess að staðir Starbucks og McDonald’s verði sniðgengnir.
Ástæðan er sú að Starbucks höfðaði mál gegn stéttarfélagi starfsmanna, Starbucks Workers Union, eftir að félagið birti yfirlýsingu á Twitter í síðasta mánuði þar sem stuðningi við Palestínu var lýst yfir. Og í Ísrael brá einn af umboðsaðilum McDonalds á það ráð að gefa ísraelskum hermönnum mörg þúsund fríar máltíðir.
Mail Online vísar í yfirlýsingu frá McDonald‘s þar sem fram kemur að fyrirtækið harmi þær misvísandi upplýsingar sem komið hafa fram um fyrirtækið og meinta afstöðu þess til ástandsins fyrir botni Miðjarðarhafs.
Fyrirtækið sé ekki á bandi eins eða neins og styðji ekki við yfirvöld þeirra ríkja sem hlut eiga að máli. Umrædd ákvörðun umboðsaðila McDonald’s í Ísrael hafi verið tekin án vitneskju fyrirtækisins. „Hugur okkar er hjá þeim sem eiga um sárt að binda vegna þessara átaka. Við fordæmum ofbeldi af öllu tagi og stöndum gegn hvers konar hatursorðræðu. Dyr okkar hafa alltaf og verða alltaf opnar öllum.“
Myndbönd af skemmdarverkunum má sjá hér að neðan:
