22 mínútna hröð ganga, trimm eða hjólatúr á hverjum degi getur unnið gegn neikvæðum áhrifum kyrrsetu lífsstíls og eykur líkurnar á að fólk lifi lengur.

Þetta eru niðurstöður nýrrar rannsóknar. Sky News segir að vísindamenn hafi komist að þeirri niðurstöðu að fólk sem situr lengi, til dæmis skrifstofufólk eða við sjónvarpsgláp, er líklegra til að deyja á undan þeim sem hreyfa sig reglulega. En það er hægt að eyða þessari hættu með því að hreyfa sig með hæfilegu til mikilli ákefð.

Meðal þeirrar hreyfingar sem getur komið að gagni er að ganga af krafti (meðalhraði upp á 6,4 km/klst), erfið þrif eins og gluggaþvottur eða skúringar, hjólreiðar (meðalhraði upp á minnst 16 km/klst) eða badminton.

Í rannsókninni, sem hefur verið birt í British Journal of Sports Medicine, rannsökuðu vísindamenn heilsufarsgögn 11.989 manns, eldri en fimmtíu ára. Fólkið var af báðum kynjum og frá Noregi, Svíþjóð og Bandaríkjunum. Fólkið var allt með mælitæki sem skráði hreyfingu þess.

5.943 manns sátu í minna en tíu og hálfa klukkustund daglega en 6.042 sátu lengur en tíu og hálfa klukkustund daglega.

Á fimm árum létust 805 manns.

Rannsóknin leiddi í ljós að ef fólk hreyfði sig í að minnsta kosti 22 mínútur á dag vann það gegn neikvæðum áhrifum kyrrsetunnar og gerði út af við hættuna á að deyja snemma á lífsleiðinni vegna áhrifa kyrrsetu.