Vísindamönnum tókst að búa til kjúklinga, sem eru ónæmir fyrir fuglaflensu, með því að gera breytingar á genum þeirra. Þessi áfangi gæti orðið til þess að hægt verði að vernda hænur frá því að smitast af fuglaflensu sem hefur breiðst hratt út um heiminn síðustu misserin, bæði í villtum fuglum og alifuglum.

Sky News skýrir frá þessu og segir að vísindamenn segi einnig að þörf sé á frekari rannsóknum til að koma algjörlega í veg fyrir að erfðabreytingarnar geti orðið til þess að fuglaflensuveiran stökkbreytist og taki þar með hugsanlega skref í áttina að því að geta borist í fólk.

Þegar tilraunir voru gerðar með að setja erfðabreytt gen í kjúklinga og síðan koma þeim í snertingu við fuglaflensuveiruna reyndust níu af hverjum tíu vera með vörn gegn henni. Einn sýndi örlítil merki um smit að því er fram kemur í rannsókninni sem hefur verið birt í vísindaritinu Nature Communications.

Fuglarnir héldu góðri heilsu og verptu eggjum á þeim tveimur árum sem rannsóknin stóð yfir.