Niðurstöður nýrrar rannsóknar sýna að örplast er að finna í skýjunum yfir japönskum fjöllum. Áður hafði örplast fundist á hafsbotni og djúpt í ísnum á Suðurskautinu. Nú liggur fyrir að það er einnig að finna í skýjunum. Nánar tiltekið í skýjunum yfir Fuji og Oyama fjöllunum í Japan.

The Guardian skýrir frá þessu. Fram kemur að rannsóknin sýni hvernig mengun getur breiðst yfir stór svæði og eyðilagt uppskeru og vatn þegar „plastúrkoma“ á sér stað.

Hiroshi Okochi, prófessor við Waseda háskólann, segir í tilkynningu að ef ekki verði tekist á við vandamálið varðandi plastmengun í loftinu verði hættan af loftslagsbreytingunum kannski að raunveruleika og það muni hafa í för með sér óafturkræfan umhverfisskaða. Okochi er aðalhöfundur rannsóknarinnar.

Svo mikið var af örplasti í skýjunum að vísindamennirnir telja að plastið hafi sjálft myndað ský sem hafi losað gróðurhúsalofttegundir út í andrúmsloftið.

Örplast brotnar hratt niður þegar það kemst í snertingu við útfjólublátt ljós í andrúmsloftinu og losar þar með mikið af gróðurhúsalofttegundum.