Fjölskylda hans tilkynnti um hvarf hans í október og var mikil leit gerð að honum. Hvarf hans var mánuðum saman eitt heitasta umræðuefnið á kínverska Internetinu. Mörgum spurningum var varpað fram, hugmyndum og umræður áttu sér stað. Lögreglan leitaði og leitaði að Hu en án árangurs. Í einni leitaraðgerðinni tóku mörg þúsund sjálfboðaliðar þátt.
En það var ekki fyrr en á fimmtudaginn sem lík Hu fannst. CNN segir að það hafi verið almennur borgari sem fann líkið. Það var í fötum sem pössuðu við þau föt sem Hu var í þegar hann hvarf. Lögreglan fékk því fjölskyldu hans og lögmann hennar á vettvang til að bera kennsl á líkið. DNA-rannsókn staðfesti síðan að líkið var af Hu að því er segir í tilkynningu frá lögreglunni í Shangrao. Einnig kemur fram í tilkynningunni að hljóðupptökutæki, sem fannst næri líkinu, hafi verið sent í rannsókn.
En líkfundurinn varð ekki til þess að slá á umræðurnar um málið, hann ýtti frekar undir þær og nýjar spurningar vöknuðu um kringumstæðurnar varðandi andlátið.
CNN segir að á Weibo, sem er kínverska útgáfan af Twitter, hafi umræður um dauða Hu verið fyrirferðarmesta efnið í gær. Sum myllumerkin fengu mörg hundruð milljónir lestra.
Margar athugasemdir snerust um af hverju umfangsmikil leit lögreglunnar, sem notaðist við sporhunda, dróna og hitamyndavélar, skilaði engum árangri.
Líkið fannst í aðeins 5 mínútna göngufæri frá heimavistarskólanum en á milli skógarins og lóðar skólans er tveggja metra hár veggur að sögn kínverska ríkisútvarpsins.
Búið er að kryfja líkið en niðurstöður krufningarinnar hafa ekki verið gerðar opinberar.
Það er ekki óalgengt að börn og unglingar hverfi í Kína en hvarf Hu er meðal þeirra mannshvarfa sem hafa fengið mesta athygli kínversku þjóðarinnar á síðustu árum. CNN segir að talið sé að um ein milljón manna hafi týnst í Kína 2020 eða 2.739 að meðaltali á dag!
CNN segir að á kínverskum samfélagsmiðlum hafi fólk velt fyrir sér hvernig Hu gat horfið að því er virðist sporlaust og hafi bent á að landið sé þekkt fyrir að þar er mikill fjöldi eftirlitsmyndavéla og hátæknieftirlitsbúnaður á hverju götuhorni.
Síðast sást til Hu á upptöku eftirlitsmyndavélar á heimavist hans þann 14. október, um 15 mínútum áður en kvöldkennsla átti að hefjast.
Hann hvarf á milli heimavistarinnar og kennsluhúsnæðisins, á svæði þar sem engar eftirlitsmyndavélar eru. Fjölskylda hans tilkynnti um hvarf hans sex klukkustundum síðar. Hu skildi snjallúrið sitt og reiðufé eftir á heimavistinni og var aðeins með hljóðupptökutæki og skólaskírteini, sem er notað til að greiða fyrir máltíðir í skólanum, meðferðis.
