Árið 2019 ók Daniella Leis ölvuð og endaði á að aka á hús í London í Ontario í Kanada. Viðbragðsaðilar komu fljótt á vettvang og náðu henni út úr bílflakinu. Því næst byrjuðu þeir að rýma næstu hús vegna gasleka sem ákeyrslan hafði valdið.

En 15 mínútum síðar varð mikil sprenging og segir cbc.ca að hún hafi gjöreyðilagt fjögur hús og múrsteinar, sem flugu allt að tvö hundruð metra, hafi einnig valdið tjóni á eigum fólks.

Ekkert manntjón varð en sjö slösuðust lítillega.

Rannsókn leiddi í ljós að áfengismagnið í blóði Leis var rúmlega tvisvar sinnum meira en heimilt er.

Hún var dæmd í þriggja ára fangelsi fyrir ölvunaraksturinn og það mikla tjón sem hún olli en það var metið á sem svarar til um 1,4 milljarða íslenskra króna.

Nú hefur Daniella, í samvinnu við föður sinn Shawn, höfðað mál gegn Ovations Ontario Food Services sem á barinn þar sem hún sat að sumbli fyrir slysið.

Í stefnunni kemu fram að hún fari fram á uppreist æru og réttlæti í formi viðurkenningar dómstólsins á að fyrirtækið beri alla ábyrgð á greiðslu þeirra bóta sem hún var dæmd til að greiða vegna slyssins.

Danielle heldur því fram að barinn og starfsfólk hans beri að hluta ábyrgð á slysinu því starfsfólkið hafi „vitað mjög vel að hún var ölvuð eða myndi verða ölvuð“. Þess utan sakar hún fyrirtækið um að hafa ekki verið með nægilega vel þjálfaða dyraverði sem gætu borið kennsl á ölvaða viðskiptavini.

Í stefnunni kemur einnig fram að Danielle takist nú á við sex málshöfðanir í tengslum við slysið. Það eru þolendur gassprengingarinnar sem standa að baki þessum málshöfðunum.