Hjónin Paul Doran og Simonne voru að njóta lífsins í sjónum við Seven Mile ströndinni í New South Wales í Ástralíu ásamt þremur börnum sínum þegar allt í einu kom mikill öldugangur sem hreif dóttur þeirra með sér út í sjóinn. Dóttirin sem um ræðir er 11 ára gömul en Paul og Simonne fóru strax af stað í að bjarga dóttur sinni og hinum tveimur börnum sínum. Þeim tókst að koma öllum börnunum á land en Paul drukknaði við það að bjarga dóttur sinni.

„Paul drukknaði og lést er hann og eiginkona hans sýndu mikið hugrekki og björguðu börnunum sínum,“ er haft eftir bróður Simonne, Brendan McDonnell, í frétt Nine News um málið. „Það er erfitt að trúa því að við séum búin að missa Paul,“ segir Brendan sem bætir við að andlátið sé fjölskyldunni afar þungbært.

Paul flutti ásamt fjölskyldu sinni frá Írlandi til Ástralíu í júlí á síðasta ári. Þau höfðu því ekki búið í landinu í ár þegar líf þeirra breyttist til muna. Paul, sem var 45 ára gamall þegar hann lést, hefur verið lýst sem fjölskyldumanni sem vildi aðeins það besta fyrir sína nánustu. Honum var umhugað um menntun barnanna sinna og hvatti þau til að taka þátt í íþróttum og öðrum tómstundum, þar að auki hafði hann það í hávegum að eyða tíma saman sem fjölskylda.

„Það er einmitt það sem þau voru að gera þetta kvöld sem hann lést við að bjarga þeim,“ segir í yfirlýsingu frá fjölskyldunni.