Egypsk yfirvöld skýrðu frá því nýlega að gröf, sem fannst við Luxor, sé um 3.500 ára gömul. Fornleifafræðingar telja að í henni séu jarðneskar leifar konungborinnar manneskju.

Það voru breskir og egypskir fornleifafræðingar sem fundu gröfina á vesturbakka Nílar þar sem Dalur drottninganna og Dalur kónganna eru.

Mostafa Waziri, forstjóri egypska fornminjaráðsins, sagði að miðað við fyrstu munina sem fundust í gröfinni þá sé hægt að ætla að gröfin sé frá tíma faraóanna Akhenaton og Tutankhamum.

Piers Litherland, hjá Cambridgeháskóla, stýrir starfi bresku fornleifafræðinganna á svæðinu. Hann segir að gröfin sé hugsanlega gröf konungborinnar konu af ætt Thutmosid.

Gröfin er sögð í slæmu ásigkomulagi að innanverðu. Áletranir á veggjum hafa eyðilagst í flóðum sem jafnframt hafa fyllt grafhvelfinguna með sandi og kalksteini.