Það gerist stundum að langur tími líður frá andláti og þar til það uppgötvast en í þessu máli er tíminn óvenjulega langur því lögreglan telur að um 20 ár séu síðan viðkomandi lést. Enginn hafði saknað hans í öll þessi ár.
Um 12.000 manns búa í Mallow og virðist sem hins látna hafi ekki verið saknað af neinum.
Beinagrindin fannst í yfirgefnu húsi sem er löngu búið að negla fyrir gluggana á. Lögreglunni var tilkynnt um málið eftir að starfsmenn sveitarfélagsins hófust handa við meindýraeyðingu í og við húsið en kvartað hafði verið undan meindýrum á svæðinu.
Starfsmennirnir fundu svo beinagrindina í rúminu. Hún var flutt til rannsóknar á háskólasjúkrahúsið í Cork. Niðurstaðan var að sögn Irish Mirror að beinagrindin sé af manni sem átti heima í húsinu. Hann hafði ekki sést áratugum saman, eða síðan hann var rétt rúmlega sextugur. Hann hafði haldið sig út af fyrir sig í gegnum tíðina og töldu nágrannar hans að hann hefði flutt aftur til Englands en þar hafði hann búið um hríð.
Kenning lögreglunnar um að maðurinn hafi látist fyrir um 20 árum byggist á því að í ísskáp hússins fannst smjör sem rann út 2001.
