Houten var dæmd í fangelsi árið 1969 fyrir að hafa stungið hjónin Leno LaBianca og Rosemary LaBianca til bana á heimili þeirra í Los Angeles. Hún var aðeins 19 ára þegar hún framdi ódæðisverkið og um leið yngsti meðlimurinn í söfnuði Manson.
Manson lést 2017, 83 ára að aldri, en hann var einn umtalaðist glæpamaður síðustu aldar. Hann fyrirskipaði fjölda morða sem voru framin í Los Angeles sumarið 1969.
Þekktasta morðið var þegar leikkonan Sharon Tate, sem var barnshafandi, var myrt ásamt fjórum vinum sínum af áhangendum Manson.
Nancy Tetreault, lögmaður Houten, segir að hún fái reynslulausn innan nokkurra vikna.
Gavin Newsom, ríkisstjóri í Kaliforniu, hefur barist gegn því að hún fái reynslulausn en hefur nú játað sig sigraðan og segir að áfrýjun ákvörðunar um reynslulausn muni væntanlega ekki bera árangur.
Markmiðið með morðunum var að varpa sökinni á svarta Bandaríkjamenn og koma þannig kynþáttastríði af stað.
Manson og fjórir áhangendur hans voru dæmdir til dauða en dómunum var síðar breytt í ævilangt fangelsi.
Manson sótti 12 sinnum um reynslulausn en fékk alltaf synjun. Á þeim 40 árum, sem hann sat í fangelsi, braut hann reglur fangelsisins rúmlega 100 sinnum. Hann hafði meðal annars í hótunum við fangaverði, líkamsárásir og vörslu vopns.
