En honum fannst greinilega svo gaman í Disneylandi að hann fór þangað dag eftir dag. Í átta ár, þrjá mánuði og þrettán daga missti hann ekki einn einasta dag úr.
Nú er hann kominn í Heimsmetabók Guiness fyrir þetta því enginn hefur farið eins oft í Disneyland óslitið. Heimsmetabókin tilkynnti nýlega að hinn fimmtugi Reitz væri nú komin á spjöld sögunnar. The Guardian skýrir frá þessu.
Los Angeles Times hefur eftir honum að honum hafi brugðið þegar hringt var í hann frá Heimsmetabókinni og honum tilkynnt um metið.
Hann sagðist hafa verið atvinnulaus 2012 og hafi byrjað að heimsækja skemmtigarðinn daglega, honum hafði verið gefinn ársmiði, til að brjóta daginn upp og hvíla sig á atvinnuleitinni.
Heimsóknirnar styrktu hann andlega og áður en hann vissi af var hann búinn að fara daglega í tvo mánuði. Þegar hann fór í sextugustu heimsóknina var garðurinn opinn samfleytt í sólarhring til að fagna hlaupaári. Þá hitti Reitz blaðamann sem fór síðan að fylgjast með færslu Reitz á samfélagsmiðlum en hann birti alltaf færslu þegar hann kom í Disneyland. Að lokum skrifaði hann grein um Reitz og þannig fór fólk að vita af honum.
Hann náði 2.995 dögum í röð en þá kom heimsfaraldur kórónuveirunnar til sögunnar og eyðilagði þetta fyrir honum því garðinum var lokað í rúmlega ár.
Hann varð að skipuleggja sig vel eftir að hann fékk vinnu. Hann fór þá stundum árla dags, seint á kvöldin eða þegar hann var í pásu í vinnunni.
Met hans verður líklega aldrei slegið því eftir að garðurinn var opnaður á nýjan leik þurfa gestir að panta aðgang fyrir fram og ekki er öruggt að hægt sé að verða við öllum pöntunum. Þá er lokað í nokkra daga í desember fyrir handhafa árskorta.
