Án nokkurs fyrirvara veiktust mörg hundruð skólastúlkur í Qom og Borujerd í Íran og þurfti að leggja þær inn á sjúkrahús. Enn hefur ekki tekist að skýra hvað var að þeim eða af hverju það voru nær eingöngu stúlkur sem veiktust.

The Guardian segir að yfirvöld hafi nú staðfest að verið sé að rannsaka orðróm um að eitrað hafi verið fyrir stúlkunum í „hefndarskyni“ fyrir mótmælin sem hafa staðið yfir í landinu síðustu mánuði.

Younes Panahi, varamenntamálaráðherra, sagði að flest fórnarlömbin hafi þurft á „mildi meðferð“ að halda. Hann sagði að komið hafi í ljós að efni hafi verið notuð til að eitra fyrir stúlkunum, þó ekki kemísk efni eins og eru notuð í stríðsrekstri. Hann sagði að reynt hafi verið að hræða stúlkurnar frá að ganga í skóla og það virðist hafa virkað því eftir þetta hafa flestar stúlkur í skólum bæjanna hætt námi.

Homayoun Sameyah Najafabdi, sem á sæti í heilbrigðismálanefnd þingsins, staðfesti við The Guardian að vísvitandi hafi verið eitrað fyrir stúlkunum.

Fyrstu veikindin komu fram í lok nóvember en þá þurftu 18 stúlkur úr skóla í Qom að fá meðhöndlun á sjúkrahúsi eftir að þær fundu fyrir ógleði, höfuðverk, öndunarörðugleikum og óreglulegum hjartslætti. Í desember veiktust um 50 stúlkur, úr sama skóla, til viðbótar.

Engar fréttir hafa borist af dauðsföllum.