Harold Riley, 50 ára, lést nýlega skömmu eftir að hann steig út úr járnbrautarlest á lestarstöð í Virginíu í Bandaríkjunum. Hann stóð á brautarpallinum en hundur hans, sem var fastur við hann með taumi, var enn inni í lestinni þegar lestinni var ekið af stað. Riley dróst eftir brautarpallinum og niður á teinana.

Riley var úrskurðaður látinn við komuna á sjúkrahús.

Lögreglan segir að ekki hafi verið að sjá að hundurinn hafi verið þjónustuhundur en dætur Riley sögðu í samtali við Sky News að hundurinn, sem heitir Daisy, sé alltaf í sérstöku vesti ætluðu þjónustuhundum.

Hundar mega ekki fara um borð í lestir í Virginíu nema um þjónustuhunda sé að ræða eða ef þeir eru hafðir í búri.

Lögreglan vinnur nú að rannsókn á tildrögum slyssins.