Líklegt þykir að ný bylgja fuglaflensu skelli á Bretlandseyjum í vor. Bretar hafa glímt við fuglaflensu síðustu mánuði en hún hefur lagt mikinn fjölda fugla að velli og miklum fjölda alifugla hefur verið slátrað vegna hennar.

The Guardian segir að sérfræðingar telji líklegt að þegar farfuglar koma til landsins á næstu vikum og mánuðum beri þeir fuglaflensuveiru með sér og ný bylgja skelli á og sé útlitið slæmt.

Núverandi fuglaflensufaraldur er af völdum H5N1 afbrigðis veirunnar en það á uppruna sinn í alifuglabúum í Asíu og hefur breiðst út um allan heim. Gegna sýktir farfuglar lykilhlutverki við að bera veiruna út.

Á Bretlandseyjum hafa 65 tegundir villtra fugla smitast á síðustu tveimur árum. Til dæmis drápust um 16.000 helsingjar á Solway Firth síðasta vetur og rúmlega fjórðungur kría í landinu drapst síðasta sumar. Á eyjunni Foula, einni Hjaltlandseyja, drápust 1.500 skúmar eða um 4% af öllum skúmum í heiminum.