Dómstóll í Súdan dæmdi nýlega þrjá menn til aflimunar fyrir að hafa stolið gaskútum. Samkvæmt dómnum á að taka hönd af þeim. Þetta er í fyrsta sinn í tæpan áratug sem dómur af þessu tagi hefur verið kveðinn upp í landinu. Óttast margir að landið sé nú að færast aftur á stig öfgahyggju.

Mennirnir, sem eru á þrítugsaldri, voru fundnir sekir um að hafa stolið gaskútum í Omdurman, sem er fjölmennasta borg landsins. Þeir voru einnig dæmdir í þriggja ára fangelsi og til að greiða sem nemur um hálfri milljón króna í sekt.

Herinn tók völdin í landinu fyrir 15 mánuðum en í kjölfar valdaránsins fór jafnvægið í landinu úr skorðum og þróunin í átt til lýðræðis stöðvaðist.

Mennirnir eru nú í Koper-fangelsinu þar sem þeir verða aflimaðir en ekki hefur verið ákveðið hvenær það verður gert.