Myndir af því að borða, leika sér og bara vera til.
Það er auðvitað stórmerkilegt að eignast barn og góðir vinir ættu því að geta séð í gegnum fingur sér þegar hver myndin á fætur annarri birtist af barninu. Nú ef ekki, þá hljóta þeir bara að eyða þér af vinalistanum.
En hópur ástralskra vinkvenna gerði svolítið allt annað að sögn MailOnline.
Þær skrifuðu bréf til vinkonu sinnar, Jade Ruthven, sem var nýbúin að eignast dótturina Addison:
„Jade, ég er búin að tala við nokkrar af stelpunum og við erum allar svo ÞREYTTAR á sífelldum færslum þínum um líf þitt og allt sem Addy gerir. Taktu eftir, við eigum allar börn sem við erum heillaðar af, vittu til, öllum foreldrum finnst börnin þeirra langbest. En við troðum því ekki niður í kokið á öllum öðrum!!!! Hún er í nýjum fötum – taktu mynd og sendu hana í einkaskilaboðum til þess aðila sem gaf henni þau – ekki til allra!!!! Okkur er alveg sama.“
Síðan héldu þær áfram og skrifuðu:
„Stoppaðu nú við og hugsaðu þig um, ef hver einasta móðir birti allt á samfélagsmiðlum um barnið sitt er ég viss um að þú yrðir fljótt þreytt á því. Við getum ekki beðið eftir að þú byrjir að vinna. Þá hefur þú kannski ekki eins mikinn tíma til að vera á Facebook. Addy er frábær og við elskum hana allar en börnin okkar eru líka frábær. Ég held að þú reitir marga til reiði með þessu „Addy hér, Addy þar“. Við héldum allar að það myndi draga úr þessu eftir fyrsta mánuðinn en það hefur ekki gerst.“
Jade brá mikið þegar hún las bréfið og segist hafa nötrað af reiði yfir að svokallaðar vinkonur hennar séu svo hjartalausar og hafi ekki kjark til að skrifa undir bréfið með nafni.
