Hollenska þjóðskjalasafnið hefur birt fjársjóðskort á netinu sem á að sögn að vísa á fjársjóð sem fjórir þýskir hermenn grófu niður í Hollandi á síðustu dögum síðari heimsstyrjaldarinnar. Margir hugsa sér gott til glóðarinnar og vilja finna fjársjóðinn.

The Guardian skýrir frá þessu og segir að vonir hafi vaknað hjá mörgum, um að þeir geti fundið fjársjóðinn, eftir að þjóðskjalasafnið birti fjársjóðskortið. X er merkt inn á kortið og á það að sýna hvar fjársjóðurinn er grafinn.

Fjársjóðurinn er í fjórum skotfærakössum en hann samanstendur af mynt, úrum, skartgripum, demöntum og öðrum eðalmálmum. Talið er að verðmæti hans í dag sé sem svarar til tæplega þriggja milljarða íslenskra króna.

Annet Waalkens, ráðgjafi hjá þjóðskjalasafninu, sagði að margir rannsakendur, blaðamenn og áhugafornleifafræðingar hafi mikinn áhuga á skjölunum, en auk fjársjóðskortsins voru um 1.300 skjöl gerð opinber. En hvort einhverjum tekst að finna fjársjóðinn er síðan annað mál.