Sali Hafez mætti með leikfangabyssu, sem er að hennar sögn í eigu litla frænda hennar, í banka í Beirut, höfuðborg Líbanon, í vikunni og tók út sparnaðinn sinn. Hafez hafði áður farið í bankann til að taka út sparnaðinn en þá var henni sagt að hún mætti aðeins taka út lítinn hluta hans í hverjum mánuði.
Það virkaði ekki fyrir Hafez þar sem hún þurfti peningana til að borga fyrir krabbameinsmeðferð 23 ára gamallar systur sinnar. Í umfjöllun AP um málið kemur fram að staðan í bönkum Líbanon sé slæm, reiðufé sé af skornum skammti en hömlur á úttektir hafa verið í gildi síðan árið 2019.
Hafez mætti ekki ein síns liðs í bankann heldur fylgdu henni aktívistar frá hóp sem berst fyrir fólki sem er í sömu stöðu og Hafez var í. Hafez og aktívistarnir mættu í bankann og réðust inn á skrifstofu bankastjórans. Þau neyddu starfsmenn bankans til að borga Hafez 12 þúsund bandaríska dollara og það sem nemur um 1000 dollurum í líbönskum pundum. Alls tók hún út það sem nemur um 1,8 milljónum í íslenskum krónum. Hafez segir að hún hafi þó átt um 20.000 dollara, um það bil 2,8 milljónir í íslenskum krónum, í bankanum.
„Ég braust ekki inn í bankann til að drepa neinn eða kveikja í byggingunni,“ sagði Hafez í myndbandi sem birt var í beinni útsendingu á Facebook. Þá sagðist hún vera að sækja réttindin sín til baka.