Þær benda til þess að fólk sem fylgist mjög vel með fréttum, er í raun fréttafíklar og stórneytendur á því sviði, sé líklegra til að þjást af stressi, kvíða og líkamlegum vandamálum. MedicalXpress.com skýrir frá þessu.
Hefur miðillinn eftir Bryan McLaughlin, prófessor við College of Media and Communcation við Texas Tech University, að stórneytendur frétta geti lent í vondri hringrás þar sem þeir dragast lengra og lengra inn í hringiðuna í stað þess að losna út úr henni. Þeir verði helteknir af fréttum og kanni oft hvort eitthvað nýtt sé í fréttum til að lina tilfinningalega vanlíðan sína. „En það gagnast ekki. Þeim mun meira sem þeir skoða fréttir, þeim mun meira truflar það aðra þætti lífs þeirra,“ sagði hann einnig.
Vísindamennirnir greindu svör við netkönnun sem 1.100 Bandaríkjamenn tóku þátt í.
Niðurstaðan var að 16,5% aðspurðra sýndu merki um „alvarleg vandamál“ hvað varðar fréttaneyslu. Það einkennir slíka neyslu að fólk verður svo upptekið af fréttum og fylgist svo vel með að það heltekur hugsanir þess svo mikið að það truflar samveru þess með fjölskyldu og vinum og gerir þeim erfitt fyrir við að einbeita sér að vinnu sinni. Auk þess glímir það við eirðarleysi og erfiðleika við að sofa.
Þessi hópur, sem glímir við „alvarleg vandamál“ var mun líklegri til að upplifa andlega og líkamlega erfiðleika en þeir sem eru ekki eins sólgnir í fréttir.
Af þeim sem voru með „alvarleg vandamál“ varðandi fréttaneyslu höfðu 73,6% upplifað andleg óþægindi, „mikil“ eða „mjög mikil“ en hjá þeim sem töldust vera í hópi þeirra sem voru með eðlilega fréttaneyslu höfðu 6,1% fundið fyrir andlegum óþægindum.
