Kim Leary, tveggja barna móðir frá borginni Chester í Englandi, komst nýlega að því að Craig Dunderdale, nágranninn hennar, hafði tekið yfir 50 myndir af henni í sólbaði án hennar vitneskju. Dunderdale var búinn að auka aðdrátt myndanna svo rass, brjóst og fætur Leary sæjust betur.
Myndirnar af Leary fundust þegar lögreglan gerði húsleit á heimili Dunderdale en hann geymdi myndirnar í tölvunni sinni. Ásamt þeim fundust yfir 1.500 aðrar kynferðislegar myndir og mikill fjöldi af barnaníðsefni.
Dunderdale var handtekinn vegna þessa og dæmdur í tíu mánaða fangelsi en honum hefur nú verið sleppt á reynslulausn, Leary til mikillar óánægju. „Mér líður eins og hann hafi komist upp með þetta. Þrátt fyrir að hann búi ekki hér lengur þá get ég ekki setið í garðinum mínum án þess að líða illa. Ég get ekki þurrkað út þessa minningu á meðan ég er hérna,“ segir hún í samtali við Daily Star.
„Ég vil bara að fólk viti hvað hann gerði. Fólkið sem býr í kringum hann núna gæti kannski ekki vitað hvað hann gerði. Hann eyðilagði líf mitt og hefur ennþá gríðarlega mikil áhrif á mig – hann gæti gert hið sama við einhverja aðra.“
