Frönskum siglingaáhugamanni var loks komið til bjargar eftir að hann var í 16 klukkutíma fastur á báti sem hafði hvolft. Maðurinn, sem er 62 ára gamall, sigldi af stað úr Lissabon sunnudagsmorguninn og var 23 km frá Sisargas-eyjum við strönd Galisíu í norðvesturhorni Spánar þegar hann sendi út neyðarmerki áttaleytið á mánudagskvöld. Þyrla fann bátinn, sem var þá á hvolfi, um nóttina og björgunarbátur með fimm kafara um borð staðfesti að maðurinn væri á lífi. Það var þó of dimmt og of mikill öldugangur til að koma honum út þannig að björgunarteymið batt blöðrur við bátinn til að hann héldist á floti og vonuðu að maðurinn lifði af nóttina.

Kafarar spænsku landhelgisgæslunnar sögðu við BBC að það hefði verið „nánast ómögulegt“ að hann lifði það af en næsta dag fundu kafarar hann í lofthólfi inni í bátnum, með vatn upp að hnjánum og klæddan í gúmmígalla. „Hann stakk sér í vatnið af eigin rammleik og kafaði út úr bátnum,“ sagði meðlimur viðbragðasveitar spænsku landhelgisgæslunnar við Sky News. Maðurinn var floginn á sjúkrahús en var útskrifaður stuttu seinna án vandræða.

„Hvert bjargað líf er stærstu verðlaunin okkar,“ sagði björgunarsveitin í tísti með myndbandi af afrekinu.