„Þú átt að stýra stjórnarfundum, sjá um að smakka . . . og margt annað skemmtilegt.“ Svona hljóðar atvinnuauglýsing frá kanadíska sælgætisfyrirtækinu Candy Funhouse sem er að leita að „Candy Officer“ til starfa.

Það er eflaust draumastarf margra að fá að borða sælgæti allan daginn og að fá borgað fyrir það að auki.

CNN segir að fyrirtækið bjóði 78.000 dollara í árslaun fyrir starfið en það svarar til um 10 milljóna íslenskra króna. Hinn heppni eða heppna mun sinna starfinu heima hjá sér. Litlar kröfur eru gerðar um viðveru á vinnustaðnum.

Jamal Hejazi, forstjóri Candy Funhouse, sagðist skilja vel að mörgum þyki starfið aðlaðandi. „Ímyndaðu þér alla bestu minningar þínar tengdar sælgæti og svo að fá að vinna með það daglega,“ sagði hann.

Hann sagði að það hafi komið á óvart hversu hugmyndaríkt fólk er í umsóknum sínum. Til dæmis hafi sumir sent inn myndbönd með allri fjölskyldu sinni.

Ekki liggur fyrir hversu mikið sælgæti „Candy Officer“ þarf að borða daglega.

Candy Funhouse selur súkkulaði, hlaup og lakkrís á netinu. fyrirtækið er staðsett nærri Toronto og er fjölskyldufyrirtæki.