Svissneska fiðluleikkonan Julie Berthollet hefur búið lengi í París, höfuðborg Frakklands, en nú hefur hún ákveðið að flytja þaðan eftir að hafa orðið fyrir barði óprúttinna aðila tvisvar á sama deginum. Julie flutti til París ásamt yngri systur sinni, Camille Berthollet, en þær systur mynda saman tónlistardúó þar sem Julie leikur á fiðlu og Camille á selló.
Þann 22. júní síðastliðinn var Julie að ganga meðfram Seine ánni í París þegar maður kom upp að henni og reyndi að taka iPhone símann Julie úr hendi hennar. Julie náði að halda í símann og öskraði á manninn sem flúði í burtu að lokum. „Ég er með sterkar hendur út af fiðlunni, ég veitti honum viðnám, hélt í símann og öskraði á hann: Ertu ruglaður? Heigull!“ segir Julie um atvikið í samtali við svissneska tímaritið L’Illustré.
Einungis nokkrum mínútum síðar lenti Julie aftur í svipuðu atviki en þá var hún stödd við inngang lestarstöðvar. Þar mætti henni maður sem reif af henni armböndin hennar og hálsmen, tók svo upp hníf sem hann otaði að henni til að koma í veg fyrir að hún myndi reyna að ná því sem hann rændi aftur til baka.
Julie hefur ákveðið að flytja aftur til heimalandsins vegna þessa en hún segir að íbúar París séu með það hugarfar að hugsa bara um sjálfa sig. Hún furðar sig á því að enginn hafi komið henni til hjálpar þennan daginn.
„Þetta er ekki svona í Sviss. Hér er fólk kurteist, það hunsar ekki hvert annað.“