Láglaunamaður í Chile varð heldur betur undrandi á dögunum þegar að launareikningur hans í bankanum var heldur voldugri en hann átti að venjast. Fyrir mistök hafði launadeild fyrirtækisins sem hann starfaði fyrir lagt inn á hann ríflega 300-föld mánaðarlaun. Diario Financiero, dagblað í Santiago, greinir frá.
Atvikið átti sér stað í maí á þessu ári en fram kemur að maðurinn hafi verið með um 75 þúsund krónur í útborguð mánaðarlaun. Starfsmanninum var því eðlilega nokkuð brugðið þegar útborguð laun voru yfir 24 milljónir króna, eitthvað sem tæki starfsmanninn um aldarfjórðung að vinna fyrir.
Maðurinn tilkynnti ofgreiðsluna til yfirmanns síns og fékk að lokum þau skilaboð frá fyrirtækinu að hann mætti gjarnan fara í bankann næsta dag og endurgreiða launin.
Starfsmaðurinn fór samviskusamlega í bankann en í stað þess að endurgreiða féið tók hann allan peninginn út af bankareikningi sínum og lét sig síðan hverfa.
Eftir þrjá daga af hringingum og skilaboðum til starfsmannsins barst loks erindi frá lögfræðingi sem kom því á framfæri til fyrirtækisins að starfsmaðurinn hafi sagt upp störfum hjá fyrirtækinu.
Síðan þá hefur ekkert til starfsmannsins spurst en þjófnaðurinn hefur verið tilkynntur til viðeigandi stofnanna.