Sumarfrí bresku feðganna Garry James Hallows og Ethan Lee Hallow til borgarinnar Marmaris í Tyrklandi tók snöggan enda þegar Garry var kýldur af Ethan, syni sínum, eftir rifrildi þeirra feðga. The Sun fjallaði um málið.

Ekki er vitað nákvæmlega hvers vegna feðgarnir rifust en ljóst er að Ethan var afar ósáttur við föður sinn. Garry, sem var 51 árs gamall, fékk alvarleg höfuðmeiðsl eftir höggið frá syni sínum. Fólk sem varð vitni að högginu hringdi í sjúkrabíl fyrir Garry á meðan hann lá meðvitundarlaus í jörðinni. Farið var með Garry á sjúkrahús þar sem hann var úrskurðaður látinn.

Þegar Ethan var yfirheyrður af lögreglunni hélt hann því upphaflega fram að faðir sinn hefði dottið á höfuðið. Lögreglan efaðist þó um sakleysi sonarins og ákvað að rannsaka málið nánar.

Þegar lögreglan skoðaði upptökur úr eftirlitsmyndavélum á svæðinu komst það í ljós að atvikið hafði náðst á myndband. Í myndbandinu má sjá feðgana rífast á gangstétt og svo sést hvernig Ethan kýlir föður sinn í höfuðið. Garry sést svo falla í jörðina eftir höggið.

Ethan hefur nú verið handtekinn af lögreglunni og verður hann í haldi hennar á meðan rannsókn málsins stendur yfir.