Þegar Sergio Rodriguez, frá borginni Weston í Flórída í Bandaríkjunum, fann köttinn sinn, Bean, dáinn í byrjun júní á þessu ári þá var búið að skera köttinn í tvennt. Sergio fann einungis annan helminginn af kettinum sínum. Samkvæmt Miami New Times sögðu nágrannar honum að þetta væri ekki í fyrsta skipti sem köttur hefur fundist dáinn og aflimaður í borginni.
Embætti sýslumanns á svæðinu staðfesti að þetta er ekki í fyrsta skipti sem þetta gerist en embættið veit af tveimur tilvikum þar sem kettir finnast í þessu ásigkomulagi. Embættið hvatti íbúa á svæðinu til þess að tilkynna embættinu ef kettir finnast látnir og aflimaðir.
Íbúar í hverfinu eru sagðir óttaslegnir yfir þessu og grunar einhverja að einhver manneskja hafi framið þessi ódæðisverk. Þá fullyrða yfirvöld að kettirnir hafi ekki verið myrtir af öðru dýri, ljóst sé að einhver manneskja hafi drepið þá. Í skýrslu um málið segir að einn kötturinn virðist hafa verið skorinn í tvennt með hníf.
„Það var ekkert blóð á kettinum eða í grasinu í kringum köttinn,“ segir einnig í skýrslunni.
Robert Ruderman, dýralífssérfræðingur á svæðinu, er þó á því að kötturinn gæti hafa verið drepinn af öðrum ketti eða hundi. Hann telur líklegast að laus hundur beri sök í málinu. Eitthvað hefur verið um að sléttuúlfar finnist á svæðinu en alls hafa 23 slíkir sést síðan í janúar árið 2019. Ruderman telur þó ólíklegt að sléttuúlfur beri ábyrgð á þessu þar sem þeir eru ekki vísir til þess að skylja hræin eftir.