Þetta kemur fram í tilkynningu frá ákæruvaldinu. Þar segir að fólkið hafi útvegað sér virk vopn og skotfæri. Það hafi einnig orðið sér úti um efni og búnað sem gerði þeim kleift að búa til sprengiefni sem átti að nota til að fremja hryðjuverk.
„Það er mat okkar að þessar áætlanir hafi farið út um þúfur því fólkið var handtekið af lögreglunni,“ hefur Ekstra Bladet eftir Lise–Lotte Nilas, ríkissaksóknara í Kaupmannahöfn.
Fólkið var handtekið af leyniþjónustu dönsku lögreglunnar í febrúar á síðasta ári og hefur það setið í gæsluvarðhaldi síðan.
Fólkið er einnig ákært fyrir að hafa fjármagnað hryðjuverkastarfsemi með því að hafa sent peninga til aðila sem tengdist hryðjuverkasamtökunum sem kenna sig við Íslamska ríkið.
Konan er með danskan og erlendan ríkisborgararétt. Ákæruvaldið krefst þess að hún verði svipt danska ríkisborgararéttinum og vísað úr landi fyrir fullt og allt. Einnig er farið fram á að körlunum verði vísað úr landi fyrir fullt og allt.
Fólkið neitar sök.