Margir fá sér hulstur utan um farsímann sinn til að vernda hann fyrir tjóni. En leðurhulstur er ekki eitthvað sem er gott að fá sér utan um símann. Ástæðan er að rannsókn hefur leitt í ljós að það eru tvöfalt fleiri bakteríur á farsíma í leðurhulstri en símum í hulstrum úr öðrum efnum.
Það var hreinlætisfyrirtækið Intial sem rannsakaði farsíma og gerði svokallað ATP-próf á þeim. Var magn örvera á yfirborði þeirra mælt og sýndi rannsóknin að almennt séð gleymum við að þrífa farsímana okkar.
Að meðaltali voru farsímarnir 6,5 sinnum skítugri en meðalklósettseta. En magn baktería var áberandi meira á farsímum í leðurhulstri. Að meðaltali voru tvöfalt fleiri bakteríur á þeim en öðrum farsímum.
Ástæðan fyrir þessari hrifningu baktería á leðurhulstrum er að þær þrífast betur á lífrænum efnum en gerviefnum. Þær þrífast raunar svo vel að á skítugasta símanum, hvað varðar magn baktería, fundust 35 sinnum fleiri bakteríur en á klósettsetu.
