Vísindamenn gerðu nýlega ótrúlega uppgötvun í risastórri holu í suðurhluta Kína. 192 metra undir yfirborði jarðar fundu þeir algjörlega ósnertan skóg. Hann er ævaforn og sum trén þar eru allt að 40 metrar á hæð.

The Guardian skýrir frá þessu og segir að ekki sé útilokað að í holunni séu áður óþekktar plöntu- og dýrategundir.

Það voru vísindamenn sem fundu skóginn þegar þeir voru að rannsaka risastóra holu í Guangxi. Holan er 306 metrar á lengd, 150 metrar á breidd og það eru 192 metrar frá yfirborðinu niður á botninn.

Chen Lixin, sem er verkfræðingur við Karst Geology, sagði í samtali við kínverska ríkisfjölmiðla að eftir margra klukkustunda vinnu hafi þéttur skógur mætt vísindamönnunum á botni holunnar. Hann hafi náð þeim í axlarhæð.

Hann sagði að það muni ekki koma honum á óvart ef áður óþekktar plöntu- eða dýrategundir séu í holum af þessu tagi.

Það er í sjálfu sér ekki óþekkt að gróður vaxi í holum af þessu tagi.

Vísindamenn segja að í þessum tilfelli sé þó um mjög sjaldgæfa uppgötvun að ræða því holan er mjög djúp og trén hafi náð mikilli hæð.