Að minnsta kosti flytja ríkisfjölmiðlar landsins þessar fréttir í dag en rétt er að hafa í huga að frjálsir fjölmiðlar eru ekki til í Norður-Kóreu og stjórnvöld stýra öllum fréttaflutningi með harðri hendi.
KCNA fréttastofan segir að „árangur“ hafi náðst í baráttunni við faraldurinn og nú sé smitkúrvan á niðurleið.
Í gær fundust 134.510 manns, sem voru með hita, í landinu og var það þriðji dagurinn í röð sem fjöldinn var undir 200.000. Yfirvöld segja að 68 manns hafi látist frá 12. maí en þá tilkynntu yfirvöld að kórónuveiran hefði borist til landsins.
Erlendir sérfræðingar höfðu miklar áhyggjur af faraldrinum í Norður-Kóreu því ekki hefur verið bólusett gegn veirunni þar í landi, innviðir landsins eru veikburða, þar á meðal heilbrigðiskerfið, og skortur er á mat, lyfjum og öðrum nauðsynjavörum.
Þær 25 milljónir sem búa í landinu búa við nær algjöra einangrun því landið er harðlokað og þess vandlega gætt að fréttir frá útlöndum berist ekki til landsmanna.