Almennt einskorðast apabólan við Afríku en í ár hefur hún verið að greinast á stöðum þar sem hún hefur ekki verið greind áður. Greind hafa verið tilfelli til að mynda í Bretlandi, Spáni, Ísrael, Frakklandi, Sviss og Ástralíu svo ekki séu talin með Bandaríkin og Kanada. Alls hafa um 190 tilfelli greinst í 16 þjóðum, samkvæmt ABC News.
Starfsmaður Alþjóðaheilbrigðisstofnunarinnar sagði AP að „reif“ (e. rave) í Belgíu og Spáni sem sótt voru af fjölda samkynhneigðra og tvíkynhneigðra karla hafi spilað lykilhlutverk í dreifingu apabólunnar utan Afríku.
„Við vitum að apabóla getur dreifst við snertingu bóla smitaðra og það lítur allt út fyrir að kynferðislegt samneyti hafi aukið smithættu.“ sagði dr. David Heymann. Flestir smitaðir jafna sig eftir nokkrar vikur en um 10% tilfella geta verið banvæn. Engin dauðsföll hafa verið tilkynnt í ár.