Heilbrigðisstarfsfólk brýnir stundum fyrir fólki að nota ekki eyrnapinna því engin þörf sé á því. Eyrun eru sjálfhreinsandi og það getur beinlínis verið hættulegt að stinga eyrnapinna í eyrun.

Viðvörunarorð af þessu tagi hefði 31 árs breskur karlmaður þurft að heyra áður en hann ákvað að stinga eyrnapinna í eyrað á sér.

Hann fór að finna fyrir verkjum í vinstra eyranu og tíu dögum síðar var hann fluttur í skyndi á sjúkrahús. Þá var hann einnig farinn að þjást af miklum höfuðverk sem gerði að verkum að hann kastaði upp. Hann átti einnig erfitt með að muna nöfn fólks og því grunaði lækna að eitthvað mjög alvarlegt hrjáði manninn. The Sun skýrði frá þessu.

Læknar komust að því að maðurinn var með bakteríusýkingu í heilanum og hefði hún getað orðið honum að bana ef ekki hefði verið brugðist við í tíma. Skýrt var frá málinu í British Medical Journal.

Lækna grunaði að þessi einkenni hefðu gert vart við sig löngu áður en maðurinn var lagður inn á sjúkrahús. Heyrn hans hafði farið að hraka fimm árum áður og tvisvar hafði hann fengið meðhöndlun vegna sýkingar í öðru eyranu. Myndataka af höfði hans sýndi að hann var með sýkingu víða í höfðinu og við vinstri eyrnaganginn.

Lækna grunaði því að sýkingin ætti upptök við eyrað og við nánari rannsókn fundu þeir fremsta hluta af eyrnapinna djúpt inni í eyranu og var hann þakinn eyrnamerg. Læknar töldu að þessi litli hluti af eyrnapinna væri ástæðan fyrir því að maðurinn hafði fengið margar sýkingar í heilann undanfarin fimm ár.

Hann lá á sjúkrahúsi í eina viku. Næstu tvo mánuði þurfti hann að taka sýklalyf til að gera endanlega út af við sýkinguna.

Það þarf ekki að koma á óvart að læknar sögðu honum að hann mætti ekki nota eyrnapinna aftur.