Nú eru rúmlega 20 ár síðan iPod leit dagsins ljós. En nú hefur Apple ákveðið að hætta framleiðslunni. Nú er það aðeins iPod touch, sem er nýjasta útgáfan af iPod, sem er fáanleg og verður til sölu svo lengi sem birgðir endast. En eftir það er sögu iPod lokið, að minnsta kosti sem framleiðsluvöru.

Greg Joswiak, varaforstjóri alþjóðamarkaðssetningar hjá Apple, segir á heimasíðu fyrirtækisins að andi iPod muni lifa áfram. Búið sé að fella ótrúlega tónlistarupplifun inn í margar af vörum fyrirtækisins. Allt frá iPhone til Apple Watch til HomePod Mini. Auk þess sé boðið upp á slíka upplifun í Mac, iPad og Apple TV.

Frá því að iPod kom á markað 2001 hafa margar álíka vörur frá öðrum keppinautum komið fram á sjónarsviðið. En með tilkomu tónlistarveitna á borð við Spotify dró úr áhuga fólks á iPod og álíka tækjum.

Fyrsta útgáfa iPod gat geymt 1.000 lög og rafhlaðan dugði í 10 klukkustundir. Nýjasta útgáfan af iPod touch kom á markað í maí 2019.