Síðasta laugardag sáu nágrannar Joseph McKinnon í bænum Trenton í Suður-Karólínu að meðvitundarlaus maður lá í garðinum við hús hans. Þeir hringdu í neyðarlínuna og voru viðbragðsaðilar strax sendir á vettvang. Ekki tókst að lífga manninn, sem var McKinnon sjálfur, við og var hann úrskurðaður látinn á vettvangi. Hann var sextugur.

Lögreglumenn fóru að kanna aðstæður á vettvangi og fundu þá lík, sem var búið að pakka inn í ruslapoka, í holu í garðinum. Var ljóst að holan var ný. Líkið reyndist vera af Patricia Dent, 65 ára, sem var unnusta McKinnon. Sky News skýrir frá þessu.

Fram kemur að krufning hafi leitt í ljós að Dent hafði verið kyrkt. Nágrannar sögðust hafa séð McKinnon grafa holu í garðinum daginn áður en hann lést.

Krufning á líki hans leiddi í ljós að hann lést af völdum hjartaáfalls.

Lögreglan segir að svo virðist sem McKinnon hafi næstum verið búinn að moka yfir líkið í gröfinni þegar hann lagði skófluna frá sér, gekk á brott og fékk hjartaáfall.