Í ágúst 2017 myrti danski hugvitsmaðurinn Peter Madsen sænsku blaðakonuna Kim Wall um borð í kafbáti sínum í Eystrasalti. Hann hlutaði líkið síðan í sundur og henti í sjóinn. Dönsku lögreglunni tókst að finna líkamshlutana og Madsen var síðar dæmdur í ævilangt fangelsi. Nú hefur dönskum lögreglumanni verið vikið frá störfum, tímabundið til að byrja með, vegna nýrra vendinga í málinu.

Ekstra Bladet skýrði frá þessu í morgun. Málið snýst um að lögreglumaðurinn, sem er aðstoðaryfirlögregluþjónn í Kaupmannahöfn, er grunaður um að hafa deilt óviðeigandi myndefni af líkhlutunum. Hann er grunaður um að hafa verið með að minnsta kosti eina mynd af líkhlutunum í farsíma sínum og að hafa sent hana til fólks sem starfar ekki hjá lögreglunni.

Ekstra Bladet segir hafa heimildir fyrir að manninum hafi verið vikið tímabundið frá störfum á meðan málið er til rannsóknar en rannsókn hefur staðið yfir í tæplega tvo mánuði.

Það er sérstök stofnun, sem hefur eftirlit með störfum lögreglunnar, sem rannsakar málið eins og önnur mál þar sem lögreglumenn eiga í hlut.