Það dregur úr svefnþörfinni með aldrinum en ekki eins mikið og þú heldur líklega. Þetta kemur fram í umfjöllun Illustreret Videnskab um fimm mýtur um svefn.
Fram kemur að nýburi þurfi 17 klukkustunda svefn á sólarhring en fullorðinn 7 til 9 klukkustundir. En samsvarandi samdráttur á svefnþörf á sér ekki stað þegar fólk kemst á ellilífeyrisaldur. Fólk 65 ára og eldra getur því ekki látið fimm klukkustunda svefn duga. Raunar er svefnþörfin hjá þessum aldurshópi 7 til 8 klukkustundir á sólarhring.
Rannsókn, sem var gerð 2013, leiddi í ljós mikilvægi þess að sofa nægilega mikið. Niðurstöður hennar sýndu að skortur á svefni i nokkra daga getur haft neikvæð áhrif á ónæmiskerfi líkamans. Auk þess veldur svefnskortur því að fólk á erfiðara með að einbeita sér og læra nýja hluti og þessu til viðbótar þá dregur svefnskortur úr gagnrýnni hugsun og elju fólks. Ekki bætir síðan úr skák að svefnskortur eykur líkurnar á sykursýki, offitu, þunglyndi og alzheimerssjúkdómnum ef um langvarandi svefnskort er að ræða.
Svona er svefnþörf hinna ýmsu aldurshópa:
0-3 mánaða: 14 til 17 klukkustundir
4-11 mánaða: 12 til 15 klukkustundir
1-2 ára: 11 til 14 klukkustundir
3-5 ára: 10 til 13 klukkustundir
6-13 ára: 9 til 11 klukkustundir
14-17 ára: 8 til 10 klukkustundir
18-25 ára: 7 til 9 klukkustundir
26-64 ára: 7 til 9 klukkustundir
65 ára og eldri: 7-8 klukkustundir.