Í gær kom Anderson Lee Aldrich, 22 ára, fyrir dómara í Colorado Springs í Bandaríkjunum. Hann mætti að vísu ekki í dómsalinn en var viðstaddur í gegnum fjarfundabúnað. Hann er grunaður um hatursglæp, að hafa skotið 5 til bana á skemmtistað hinsegin fólks um helgina. Hann er vistaður í fangelsi í Colorado.

Það vakti töluverða athygli að Aldrich var með greinilega áverka á andliti og notaði hjólastól.

Þetta var í fyrsta sinn, eftir árásina, sem almenningur fékk að sjá hann.

Hann er grunaður um að hafa skotið fimm til bana aðfaranótt laugardags og að hafa sært 18 til viðbótar. Þetta gerðist á næturklúbbnum Club Q. Aldrich gekk þangað inn með riffil og byrjaði strax að skjóta á gesti og starfsfólk. Klúbburinn er mikið sóttur af hinsegin fólki.

Þremur gestum tókst að yfirbuga Aldrich. Meðal þeirra var Richard Fierro. Hann er uppgjafahermaður sem barðist í Afganistan og Írak.

Hann lamdi Aldrich í höfuðið með skammbyssu hans. Að minnsta kosti tveir aðrir gestir spörkuðu í Aldrich þar til lögreglan kom á vettvang.

Hann lá á sjúkrahúsi þar til á þriðjudaginn en þá var hann fluttur í El Paso fangelsið í Colorado Springs.