Í dag fara fram réttarhöld hjá undirrétti í Herning í Danmörku í máli ákæruvaldsins gegn 54 ára karlmanni. Hann er ákærður fyrir að hafa á tímabilinu frá 2017 til 2020 gefið sæði sitt að minnsta kosti fimm sinnum og komið til kvenna í Danmörku.

Þetta gerði hann án þess að hafa tilskilin leyfi frá heilbrigðisyfirvöldum. Ekstra Bladet skýrir frá þessu.

Málið er hið fyrsta sinnar tegundar í Danmörku að sögn Tyge Trier, verjanda hans. Hann sagði að maðurinn mótmæli því ekki að hann hafi látið konum sæði í té en segi að þetta hafi verið konur sem hann hafi haft tengsl við og að hann hafi ekki hagnast á þessu. Af þeim sökum falli þetta ekki undir ákvæði laga.

Trier sagði mikilvægt að maðurinn fái að segja sína hlið málsins fyrir dómi. Hann telji sig hafa hjálpað barnlausum pörum án þess að hafa haft nokkurn ávinning af því.

Lögreglan segir að maðurinn eigi sekt upp á sem nemur allt að tveimur milljónum íslenskra króna yfir höfði sér ef hann verður sakfelldur.

Trier sagðist telja að ef hann verði sakfelldur lendi fleiri karlar í vanda.

Þrjár konur hafa verið kallaðar fyrir dóm sem vitni.